Тевдовски: Скриените обврски се поголеми од дефицитот на Македонија
Објавено во: Економија 04 Јануари, 2018
Според министерот за финансии Драган Тевдовски, скриениот долг на државните институции изнесува околу 360 милиони евра со што го надминува дефицитот кој изнесува 300 милиони евра и тоа преставува сериозен проблем со натрупани обврски.
Затоа за да не се трупаат долгови Министерството за финансии изработи софтвер во кој сите буџетски корисници ќе мора да ги пополнуваат своите неплатени обврски. На овој начин ќе се има постојан увид на обврските во реално време. Законот кој го овозможува ова е веќе изготвен, најави министерот за финансии, Драган Тевдовски, во интервју за МТВ.
- Втора работа што е многу важна е дека ние успеавме за кратко време дел од тие обврски да ги исплатиме. На пример, за Филхармонијата која беше помпезно отворена практично имаше неплатени сериозни долгови останати од претходната власт. Ние тие долгови успеавме во најголем дел да ги исплатиме - вели тој во интервјуто.
Тевдовски потенцира дека отворањето на транспарентоста е клучен чекор бидејќи со ова јавноста ќе има увид во трошењето на парите и ќе може да прави притисок ако некој не ги троши парите како што треба.