КАСАМИ РАЗЈАСНУВА, ТЕТОВО НЕ Е ГЛАВЕН ГРАД, ТУКУ ЦЕНТАР НА АЛБАНЦИТЕ: „Има некои што сакаат да ја злоупотребат објавата“

Добивај вести на Viber

Првиот човек на град Тетово и лидер на БЕСА, Билал Касами, за „Макфакс“ изјави дека во објавата на социјалните мрежи не напишал дека Тетово е „главен град“ туку „центар“ на Албанците во Македонија. 

Но, нема негов став за низа прашања, меѓу кои и дали е свесен дека со објавата поттикна меѓуетнички тензии. Тој не кажа ниту дали смета дека истата треба да ја избрише, за да спречи лавина негативни реакции.

„Не се работи за никаков ‘главен град’, туку за ‘центар’ на Албанците во Македонија. Во објавата стои многу јасно тоа што сакавме да го кажеме. Тоа е реалноста, а тие што сакаат да ја злоупотребат, се обидуваат да дадат друга насока“, вели Касами за „Макфакс“.

Реагираше и ВМРО-ДПМНЕ од Тетово. Велат дека таткото на градот треба да создава еднакви можности и се надеваат дека е свесен за тежината на кажаните зборови. 

„Со оваа реакција на неговата изјава ние како Општински комитет на ВМРО – ДПМНЕ Тетово сакаме да укажеме дека градоначалникот на Тетово треба да е свесен дека промоцијата на Тетово како центар на една заедница подразбира дискриминација на македонскиот народ и сите други кои живеат во Тетово. Тоа ние нема да го дозволиме. Тетово за нас е, и секогаш ќе биде срцето на Македонија и никогаш нема да биде центар само на една заедница. Градоначалникот Касами има мандат да ги следи трендовите на европските градови, а сите заедно сме тука да работиме и да придонесеме Тетово да прерасне во град во кој младите ќе сакаат да живеат, а не град од кој си заминуваат“, велат од ВМРО-ДПМНЕ, пренесе Тетовоинфо. 

Општинската организација на СДСМ од Тетово му порача на градоначалникот Билал Касами дека не треба да фаворизира една етничка група кога зборува за градот.

„Градоначалникот на Тетово, Касами очигледно нема ориентација во просторот. Недостојно е за еден градоначалник кој својата плата ја зема од парите на тетовчани кои се и Македонци и Албанци и Турци и Срби, Роми и други, да споделува вакви ставови фаворизирајќи една етничка група.  Да го потсетиме градоначалникот Касами дека на таа функција дојде благодарение на поддршката која му ја даде ВМРО-ДПМНЕ, односно со помош на македонските гласови. Очекуваме и неговиот коалициски партнер ВМРО-ДПМНЕ да излезе со осуда на ваквите ставови на нивниот градоначалник“, се вели во соопштението на СДСМ Тетово. 

Либерално-Демократска партија упатува порака дека Македонија е мултиетничка држава и Тетово е и ќе биде мултикултурен град, а не главен град на Албанците. 

„Како либерал-демократи секогаш приоритет ќе ни биде почитување и обезбедување еднакви права и можности за сите граѓани на Македонија. Симптоматично е што оваа објава доаѓа само неколку недели по барањето за формирање Заедница на албански општини, по теркот на она што се договара за Косово, барање кое дојде од Алтернатива, уште една опозициска партија од албанскиот политички блок“, рекоа од партијата.

Како што објави Општина Тетово, „градоначалникот денеска одржа средба со градоначалниците на општините во Косово и градоначалникот на општина Бујановец (Србија), на која се разговараше за реализација на заеднички проекти и за продлабочување на соработката меѓу нив“.