Добивај вести на Viber
Економската обнова на државите, се поголемиот јаз меѓу богатите и сиромашните и кризата во Украина се очекува да доминираат на Светскиот економски форум што започнува денеска во Давос. На 44-та средба на светските лидери ќе се разговара и за климатските промени и за судирот во Сирија.
Во Давос се очекуваат повеќе од 40 шефови на влади меѓу кои и австралискиот премиер Тони Абот кој претседава со Г-20, бразилската претседателка Дилма Русеф како и британскиот и јапонскиот премиер Дејвид Камерон и Шинѕо Абе.
Меѓу 2.500 учесници на форумот од сто држави се и економски експерти, добитници на Нобелова награда и претставници од синдикати и невладини организации. За безбедноста на учесниците во форумот ќе се грижат околу 3.000 војници.
Форумот во Давос се организира од 1971 и најчесто се нарекува „лабораторија на идеи“ на која се разговара за важни прашања кои се однесуваат за иднината на светот.
Истовремено, овој форум се опишува и како „независна меѓународна организација посветена на унапредување на состојбите во светот која повикувајќи политички, научни и останати личности од општества, помагаат за обликување на глобалните, регионалните и економските агенди“. Во Давос присуството е возможно само со повик од организаторот.