Судот не го пронајде Иво Котевски, обвинителите се откажаа од неговото сведочење

Добивај вести на Viber

Обвинителите Љубомир Лапе и Гаврил Бубевски го повлекоа сведокот Иво Котевски од случајот „Тортура“ откако Кривичниот суд не успеа да го пронајде поранешниот портпарол на МВР. Поранешните обвинители на СЈО го доставија овластувањето од Јавното обвинителство до судијката Александра Ристеска дека тие продолжуваат да го застапуваат истиот предмет и за прв пат одбраната немаше приговор по ова прашање. Судот ги извести присутните дека сведокот Котевски повторно не е пронајден на адресата која е наведена како место на живеалиште, па обвинителот Лапе го извести судот дека го повлекуваат овој сведок бидејќи истиот е недостапен.

На судското рочиште чиј случај за употреба на насилство при апсењето на Љубе Бошковски го отвори СЈО сите странки беа на време пристигнати со исклучок на петтообвинетиот Петар Милошевски за кого одбраната достави лекарски документ со кој се констатира повреда на коленото и наводно боледување од две недели.

Обвинителите побараа од судот да извршат увид во медицинскиот документ и веднаш по увидот реагираа бидејќи во тој документ воопшто немало боледување како пишан документ, туку единствено било препорачано контрола за една недела. Судијката Александра Ристеска побара од одбраната да достават до судот медицинска документација со која ќе го потврдат "наводното" боледување на обвинетиот Милошевски.

По безбројните условувања од страна на одбраната, се закажаа три термини за следни рочишта на 9 и 22 октомври, како и 5 ноември.