Стравот од трговска војна го потопи Волстрит

Добивај вести на Viber

Порастот на загриженоста од трговската војна меѓу САД и Кина ги потопи американските индекси. Разочарувачките податоци за вработување исто така негативно влијаеле на Вол Стрит, објавија CNBC.

Репер на блу чиповите Dow Jones отпиша 572,46 поени од вредноста, или -2,34%, до 23932,76, а Boeing и Caterpillar беа најлошо тргувани акции во индексот. Индекост на S & P 500 се намали за над 2,19%, или 58,37 поени, до 2604,47 поени, а најлош се претстави индустрискиот сектор. Технолошки NASDAQ изгуби 2,28%, или 161,44 поени, на 6915,11 поени.

Распродажбите се забрзаа во последните два часа од трговијата, откако претседателот на Федералните резерви Џером Пауел изјави дека централната банка ќе продолжи да ја зголемува каматата оваа година. Некои трејдери се надеваа дека шефот на ФЕД ќе ја признае нестабилноста на пазарот во последно време, предизвикана од трговскиот спор.

"Ова всушност е реакција на Кина. Она што го гледаме од оваа администрација, е тенденција кон најгласните изјави, од кои сите се загрижени, и потоа наоѓање на прагматично решение. Разумот можеби ќе надвладее во иднина", вели Џеј Џеј Кинахан, главен пазарен стратег во компанијата TD Ameritrade.

Откако Кина најави нови давачки за 106 американски стоки во средата, претседателот Доналд Трамп се закани со нови давачки во четвртокот, велејќи дека побарал од трговскиот претставник на САД да се разгледаат дополнителни давачки за 100 милијарди долари против Кина.

Во петокот кинеското Министерство за трговија соопшти дека земјата нема да се двоуми да реагира со "голем одговор на новите давачки од САД".

"Кина, која е голема економска сила, се смета за земја во развој во рамките на Светската трговска организација. Затоа, тие добиваат исклучителни бенефиции и поволности, особено во однос на САД. Дали некој мисли дека ова е фер. Бевме слабо застапени. СТО не е фер кон САД ", напиша Трамп на Твитер подоцна во петокот.

Акциите на Boeing и Caterpillar, две компании кои можат да бидат погодени од трговска војна со Кина, поевтинија со над 3,5%. Акциите на големите технолошки компании исто така останаа на црвена територија. Акциите на Facebook и Amazon забележаа пад од над 2%, а Netflix избриша 2,2% од вредноста по краткото поскапување на акциите во почетокот на берзанската трговија.

Индексите за кратко се зголемија во средината на трговијата, откако официјален претставник на Министерството за економија на Мексико изрази убеденост дека нов договор за НАФТА ќе биде постигнат наскоро.

Но главните индекси се вратија на црвена територија, откако министерот за финансии на САД Стивен Мнучин изјави дека постои можност за трговска војна со Кина.

"Ако дојде до нови давачки, тоа ќе и наштети на економијата", смета Скот Клеменс, главен инвестициски стратег во Brown Brothers Harriman.

Индексите паднаа по објавувањето на податоците за работни места во САД кои се послаби од очекуваните. Министерството за труд соопшти дека американската економија отворила 103 илјади работни места во март, додека економисти анкетирани од Ројтерс, очекуваа раст од 193 илјади работни места.

"За инвеститорите денешните податоци можат да се тешки за голтање покрај фактот на трговскиот конфликт, кој се чинеше дека се зајакнува со секој изминат ден", вели Мајк Лоуенгарт, потпретседател на компанијата за инвестициски стратегии E-Trade.