Стојановски од ЦУК информираше во кои села пожарите се најкритични

Добивај вести на Viber

Пожарот може да се префрли кон Бугарија, објаснуваат од Центарот за управување со кризи. 

Раководителот на Секторот за операции и координација при Центарот за управување со кризи, Горан Стојановски попладнево соопшти дека исклучително тешки сè уште остануваат пожарите во делчевскиот и пехчевскиот регион  и тоа во Нов Иствник, Пасјак, Трботивиште и Разловци. 

„Во моментот се дејствува со жива сила, со материјално-технички средства, со поддршка и помош од хеликоптерската единица на АРМ и на соседната држава Србија. Но, времето и условите се исклучително тешки. Јачината на ветерот е 60 километри на час и сето тоа отежнува и придонесува да не може да се дејствува и да се спречи пожарот“, изјави Стојановски.

Исклучително тешка е состојбата и во Пехчево и во овој момент се дејствува во месноста наречена Бајаз Тепе, Црник, Мачево.

„Има некаде над 350 луѓе на тој потег, помогнати масовно од мештаните на Пехчево, но состојбите сè уште не се под контрола. Можно е пожарот да избега во правец на Република Бугарија. Со сигурност не можеме да кажеме. Правиме напори за вклучување на дополнителни хеликоптери за да можеме барем тој појас да го заштитиме и оневозможиме продирање на просторот на територија на Република Бугарија. Се прават пресеци со градежни машини, се заоруваат ниви, односно и необработлив површини, се сечат дрвја се со цел да се спречи понатамошното интензивно ширење“, рече Стојановски.

Во Свети Николе,  пожарот е локализиран, но останува дел од Кадрифаково поради низинскиот дел и ветерот што го разнесува во сите правци.