Српската инспекција до трговците: Не ја злоупотребувајте вонредната ситуација!

Добивај вести на Viber

Српското Министерство за трговија, туризам и телекомуникации и Пазарната инспекција на Србија бараат од трговците во услови на вонредна ситуација да не предизвикуваат дополнителна нестабилност и нарушување во снабдувањето на населението со основните животни намирници. Предупредуваат и на казни доколку трговците кријат стока или ги зголемуваат цените. Секторот за пазарна инспекција, во соопштението објавено денеска, ги предупредува трговците дека секој вид нечесна, недозволена и шпекулативна работа, како што е криење на стока, зголемување на цените, условување на купувањето..., ќе биде санкциониран согласно Законот за трговија. За вакви дела е предвидена парична казна до два милиони динари (над 17.000 евра), но и забрана за вршење на дејност во траење од шест месеци до две години и јавно објавување на пресудата. Инспекторите бараат од трговците, имајќи ја предвид потребата да се спречи нарушувањето на пазарот во снабдувањето со основни животни намерници - вода за пиење, леб, млеко, масло..., да ги преземат сите потребни мерки за да не се случува недостиг во продавниците. И работното време трговските објекти треба да го приспособат на потребите на населението. Српскиот министер за трговија Расим Љаиќ денеска изјави дека инспекцијата веќе добила повеќе поплаки од граѓани дека одредени трговци ја злоупотребуваат вонредната ситуација и неоправдано ги зголемуваат цените на одредени животни намирници. Тој најави најостри санкции против ваквите профитери. Инспекторите добиле налог да вршат засилени инспекции во најпогодените подрачја, од каде стигнале информации дека одредени трговци ја зголемуваат цената на вода за пиење во шишиња и на храната.