Собранието закажа седница за избор на новата влада
Објавено во: Македонија 24 Август, 2020
Предлогот на новата влада ќе биде утре доставен во Собранието, а од таму информираат дека седницата ќе биде закажана во 11.00 часот по истите протоколи како и минатонеделната кога Талат Џафери беше избран за спикер на Законодавниот дом.
Иако најавите и очекувањата беа тоа да се случи денеска, истата се одложи поради превирањата во ДУИ околу министерските места. Крајниот рок за доставување на предлогот за нова влада до Собранието е 2 септември или уште седум работни дена.
Неофицијалните информации се дека до утре треба да се расчистат работите во ДУИ за тоа, кои ќе бидат конечните имиња кои ќе бидат предложени за министри, за што викендов имало средби на претставници од штабот во Мала Речица со претставници на незадоволните крила на партијата во Чаир и во Сарај.