„Славниот“ Туарег од авантурата на Диме Спасов одземен од Агенцијата за вработување

Добивај вести на Viber

„Славниот“ Фолксваген Туарег со кој Диме Спасов како дополнителен заменик министер за труд и социјална политика оштети две возила на улица Алжирска во Скопје и потоа бегаше од полицијата, е превземен од Министерството за земјоделство, шумарство и водостопанство.

Владата донесе одлука возилото да му се одземе на досегашниот корисник Агенцијата за вработување и да му се предаде на користење на министерството кое го предводи Трајан Димковски. И за време на неславната предизборна авантура на Спасов пред нешто повеќе од три години медиумите ја критикуваа Агенцијата за вработување за негрижа на возниот парк и за тоа како му бил доверен автомобилот на Спасов за приватни потреби вон работното време и задачи.

Станува збор за возило кое работи на погон на дизел со работна зафатнина на моторот од 2.461 см3 и сила од 128 киловати, со црна металик боја и произведен во 2008, во моментов со регистарска ознака SK-3635-AM. 

- Согасно одлуката на Владата, возилото ќе биде за службени потреби на Министерството за земјоделство, шумарство и водостопанство, гласи краткиот и потврден одговор без да ни биде одговорено поконкретно која инстанца од Министерството ќе го користи возилото и за каква намена ќе биде, во каква состојба се наоѓа возилото и дали веќе е превземено од Агенцијата за вработување.

„Опозициските портали дрско и непоткрепено манипулираа дека се случила тешка сообраќајна несрека со настанати штети што е целосна невистина. За овој типичен пример на организиран и координиран напад поттикнат во политички цели против дополнителниот заменик министер во наредните денови не е исклучено и поведување постапки пред надлежните судови за докажување на вистината“, гласеше дел од тогашната реакцијата на Спасов.

На местото каде се случи сообраќајката дојде друго лице кое се претстави како Марио Тавиќ и на полицајците им рекол дека тој го возел возилото со кое биле удрени другите возила во скопско Тафталиџе. Истовремено Спасов даваше исказ во полицијата.