СКАНДАЛ: Полицаец можел да го спречи масакрот на Флорида
Објавено во: Свет 23 Февруари, 2018
Вооружен полицаец, кој бил распореден во училиштето во Флорида во кое беа убиени 17 лица, стоел надвор од зградата во текот на престрелката и не интервенирал. Од локалната полиција потврдија дека полицаецот Скот Питерсон не сторил ништо за да го спречи минатонеделниот масакр.
- Шокиран сум. Мака ми е во стомакот. Тој никогаш не влезе - изјави Скот Израел, шериф на Броуард каунти.
Израел додаде дека Питерсон поднел оставка откако бил суспендиран од должноста.
- Питерсон не ја кажа причината зошто не влезе во зградата каде што беше напаѓачот. Тој бил присутен во кампусот на средното училиште и пристигнал во зградата 90 секунди по првиот истрел. На видео-снимките може да се забележи дека Питерсон останал надвор четири минути, а нападот траел шест минути - истакна Израел.
Нападот го изврши 19-годишниот Николас Круз, кој со полуавтоматска пушка „ар-15“ уби 15 деца и двајца возрасни. По масакрот, американскиот претседател Доналд Трамп предложи вооружување на учителите, за да се спречат вакви напади во идинина, јави Би-би-си.