Силекс АД Кратово за три месеци изгуби половина милион евра

Добивај вести на Viber

Што се случува со финансиските резултати на Силекс АД Кратово? 

Во период од една година се гледа сосема различна слика. Ако лани Силекс бил во позитива во првиот квартал со солидни приходи и крајна добивка од 200.000 евра, оваа година првото тримесечие го завршува со очајна продажба и загуба од дури половина милион евра.

Силекс АД Кратово бележи голем пад на приходите од продажба од речиси 30% во К1 2017-та и остварил околу 1,3 милиони евра, од кои 60% се реализирани на домашниот пазар. Интересно е што во овој негативен квартал Силекс има драстично зголемување на извозот, па така ако лани оствариле само 30.000 евра, во првите три месеци од годинава приходите од продажба во странство изнесуваат 470 илјади евра. 

Без оглед што Силекс годинава има вкупна помала продажба со пад на приходите од дури 650 илјади евра, во првиот квартал значително се зголемиле оперативните расходи кои сега изнесуваат дури 1,8 милиони евра. Од нив најголем удел заземаат трошоците за суровини и други материјали за кои се потрошени нешто над 900 илјади евра. 

Кај оперативните расходи нема поголеми промени во трошоците за вработените, а за услугите со карактер на материјални трошоци било платено двојно помалку иако оваа ставка е една од најмалите со околу 30.000 евра.

Силекс АД Кратово во овој квартал се ослободил и од расходите за камати, па ако лани за првите три месеци платил околу 210 илјади евра, во новиот квартал потрошил само 1500 евра што покажува дека компанијата се ослободила од долгови кон банки и други институции. 

По сите пресметани параметри од консолидираниот финансиски извештај објавен преку Македонска Берза, Силекс АД Кратово доаѓа до еден навистина негативен квартал со загуба од половина милион евра. 

Ако е некаква утеха барем повеќе вложил во суровини и материјали, а секако зголемен е и извозот што може да биде позитивен знак за наредниот период кој ќе биде предмет на наша анализа.

Х.С.