Добивај вести на Viber
Руското министерство за енергетика и Европската комисија ќе формираат работна група која ќе ги разгледува сите технички прашања во врска со проектот „Јужен тек“, објавија по заедничката средба рускиот министер за енергетика Александар Новак и еврокомесарот за енергетика, Гинтер Отингер.
Отингер отпатува специјално во Москва за да разговара за иднината на гасоводот, кој според Европската комисија се коси со европското законодавство.
Европската комисија им препорача на земјите низ кои ќе поминува гасоводот, а посебно на земјите-членки на ЕУ, да ги сменат договорите со Москва, бидејќи во спротивно ќе се соочат со кривични постапки. Според Брисел, Третиот енергетски пакет на Унијата е во спротивност со двостраните договори за проектот „Јужен тек“, бидејќи пакетот предвидува сопственикот и операторот на гасоводите на европска територија да бидат различни, како и до објектите да биде дозволен пристап на надворешни компании.
Москва за сега останува на ставот оти дополнителни преговори за веќе потпишаните договори нема да има и бара од Брисел да дозволи исклучоци од Третиот енергетски пакет на ЕУ и да не го проблематизира овој проект. Несогласувањата меѓу Русија и ЕУ за разликите во договорите со „Гаспром “ за изградба на „Јужен тек“ треба да се решат според меѓународно право, посочи неодамна рускиот заменик- министер за енергетика Анатолиј Јановскиј.
И Македонија има свое место во проектот, а според министерот за финансии Зоран Ставрески реализацијата на „Јужен поток“ ќе продолжи така како што е најавено. Тој упати и повик до Брисел и Москва, да отворат директен дијалог за решавање на сите прашања кои, како што изјави, Европската комисија ги потегна во однос на реализацијата на овој крупен меѓународен проект.