Шарл Мишел денеска за прв пат во Македонија, посета за уште едно охрабрување на земјата

Добивај вести на Viber

Првиот човек на Европскиот Совет, Шарл Мишел, денеска за прв пат ќе ја посети Македонија, а тој е следен во низата на европски челници кои за краток временски период на официјално Скопје му даваат уверување дека Брисел е целосно посветен Македонија да го направи клучниот исчекор и напролет да ги почне преговорите со Европската Унијата.

Минатата недела еврокомесарот за проширување Оливер Вархељи рече дека Македонија е целосно подготвена да ги започне преговорите со ЕУ и најави дека на Европскиот парламент му предложил да одобри 50 милиони евра за реформските процеси во земјава.

Европскиот Совет предводен од Мишел ќе го има клучниот збор за македонските преговори, а се очекува тој во Скопје да ги презентира контурите на новата методологија на преговарање, која треба да биде објавена во февруари.  Очекувањата се дека тоа е клучниот потег кој ќе го омекне ставот на францускиот претседател Емануел Макрон, кој конечно ќе треба да даде зелено светло.

Не е познато дали Мишел во Скопје потворно ќе го реафирмира прашањето за потребата од носење на Законот за јавно обвинителство, но генерално мислење е дека тој треба да се донесе до изборите во април, иако според реториката на власта и опозицијата, не изгледа дека таа работа ќе се движи со леснотија.

Мишел ќе допатува од Албанија, која ќе ја посети исто така денеска. Неговите средби со државниот и политички врв во земјава се предвидени за попладневните часови. Теми за разговор на средбите очекувано е да биде пристапувањето на земјава во ЕУ и реформскиот процес.

За време на посетата на Хрватска како земја-претседавач со ЕУ изјави дека Брисел треба да испрати силна и јасна порака до Тирана и Скопје. Тој во Загреб изрази надеж дека Советот ќе постигне согласност.

Европската комисија најави дека во февруари ќе ги објави прдлог измените на методологијата.