Добивај вести на Viber
Речиси половина од светското богатство е во рацете на само еден процент од населението. Само 85 најголеми богаташи поседуваат онолку колку што поседуваат половината најсиромашни луѓе во светот, покажа истражувањето на невладината организација „Оксфам“, објавено во пресрет на Светскиот економски форум во Давос.
Фрапантните податоци за економските разлики покажуваат дека и покрај кризата, најбогатите успеале да го зголемат својот приход во 24 од 26-те земји за кои постојат расположливи податоци. Дури 70 отсто најбогатите во светот живеат во земјите во кои економската нееднаквост е зголемена во последните 30 години, стои во извештајот.
Растот на нееднаквоста во светот е поттикнат и од мерките за штедење, неповолната политика на вработување во поглед на жените, конфискација на данокот од продажба на нафта и рудна експлоатација. Притоа, „Оксфам“ заклучува дека постои поврзаност меѓу екстремната економска нееднаквост и узурпацијата на политичката моќ од страна на богатата елита.
Извештајот на оваа меѓународна организација ќе се најде на маса пред повеќе од 2.500 претставници на влади, бизнисмени и официјални претставници од 100-тина држави од целиот свет, кои ќе се соберат во Давос неделава и ќе разговараат за сè поголемиот диспаритет на приходите како најголем ризк за напредокот на човештвото.