СДСМ: Власта остава во наследство јавен долг од над 50% од БДП
Објавено во: Економија 01 Февруари, 2017
Од СДСМ велат дека досегашната криминална власт остава во наследство на граѓаните и на Република Македонија јавен долг од над 50% од БДП.
Според нив, тоа го покажуваат вчера објавените податоци од Извештајот на Министерството за финансии, за состојбата на јавниот долг заклучно со 31 декември 2016 година.
„Долгот е се уште на критичното ниво над 50%, како што предупредија и меѓународните финансиски институции, кога изразија загриженост за темпото на задолжувања на државава. Граѓаните се тие кои ќе ги враќаат огромните долгови во милијарди евра, со камати, што ги направи досегашната неодговорна власт и тие имаат право да знаат колкав е јавниот долг на државата. Затоа е итно потребна нова Влада според мнозинската волја на граѓаните којашто ќе води реални одговорни политики и којашто посветено ќе работи на стабилизирање на нивото на јавниот долг“- додаваат од СДСМ.
Тоа значи дека министерот за финансии во заминување, Кирил Миноски, во изборната кампања ги лажел граѓаните дека јавниот долг е намален за 1,4%, стои во соопштението од СДСМ.