Руски платеници за 5.000 долари гинат во Сирија
Објавено во: Свет 24 Февруари, 2018
Руски платеници учествуваат во најжестоките борби во Сирија, помагајќи ги силите на сирискиот претседател Асад. За тоа добиваат и до 5.300 долари месечно, а посебно се истакнуваат платениците од „Вагнер ПМЦ“, кои се бореа во повеќето скорешни големи битки.
„Вагнер ПМЦ“ се најде повторно во фокусот на јавноста на 7 февруари, по инцидентот кој резултираше со десетици руски жртви. Конечниот биланс на убиени во инцидентот не е потврден, но се` уште не е јасно зошто руските платеници ја нападнале базата на сириските Курди, каде што биле присутни и американски воени советници. Американската војска се одмазди со воздушни напади, во кои, според непотврдени информации, биле убиени над сто руски платеници.
Американското министерство за финансии во јуни 2017 година воведе санкции против „Вагнер ПМЦ“, поради нејзината вмешаност во украинскиот конфликт. Нејзини платеници, како што пренесува Би-би-си, учествуваа во руското воено преземање на Кримскиот Полуостров во март 2014 година, како и во борбите во источна Украина.
Најновите податоци покажуваат дека „Вагнер МПЦ“ има најмалку 2.500 луѓе во Сирија. За ангажманот на сириското бојно поле, руските платеници месечно добиваат до 300.000 рубљи, односно околу 5.300 американски долари.