РЕШЕН ПРОБЛЕМОТ - дебарските сточари пак ќе можат да го продаваат млекото

Добивај вести на Viber

Решен е проблемот со млекопроизводителите во Дебар и Центар Жупа, соопшти МВР.

„Локалната самоуправа, во соработка со Центарот за управување со кризи и другите надлежни субјекти во кризниот штаб, го реши вчерашното барање на група млекопроизводители за изнаоѓање начин за  откуп на нивното млеко“, информираа од Министерството.

Деновиве дел од дебарските сточари и сопственици на молзни крави протестираа поради неможноста да го пласираат своето млеко, по вовоедувањето на кризната состојба во општините Дебар и Центар Жупа.

„Дневно пласиравме по над 1.500 литри млеко. Сега можете да разберете колкава штета ни се предизвикува. Ништо не ни останува друго туку млекото да го истураме“, рекоа сточарите.

Тие го повторија апелот до надлежните да се дозволи влез на возилата на фирмата која врши откуп на млеко, на идентичен начин како и оние на фабриката „Кнауф".

Инаку, МВР информира дека во општините Дебар и Центар Жупа, каде е прогласена кризна состојба, изминатата вечер поминала мирно, а безбедносната состојба е стабилна. Во полициските станици во Дебар и во полициската канцеларија во Центар Жупа не биле регистрирани собирања на граѓани на јавни места, немало нарушувања на јавниот ред и мир, кражби или други имотни деликти и не се регистрирани сообраќајни незгоди.

„Непречено продолжуваат активностите на полициските службеници кои се во согласност со оперативниот план за работа и во координација со локалната самоуправа, со кризниот штаб, со Центарот за управување со кризи и се во насока на контрола на целото подрачје, посебно на угостителските и другите јавни објекти (маркети, ноќни клубови, фитнес салони, обложувалници). Целта е доследно спроведување на мерките за спречување на внесување, ширење и за сузбивање на корона вирусот“, велат од МВР.

На терен без проблеми и застои се спроведуваат мерките за контрола на патнички и други моторни возила за влез во Дебар и Центар Жупа. Непречено се одвива дотурот на храна, лекови, средства за лична хигиена и други потреби за граѓаните во двете општини. Сите правни лица кои вршат дотур треба да се најават во Кризниот штаб на фиксниот телефон 046/831 051 по што, нивните возила, со полициска придружба ќе бидат спроведени до трговските објекти во двете општини. 

„Потсетуваме дека влезот е дозволен само на лица кои се жители на општините, а истовремено оневозможен е, односно строго е забранет излезот на сите граѓани затекнати на подрачјето на двете општини“, велат од МВР.

Додаваат дека сите оние кои ги прекршуваат дадените препораки, ќе бидат санкционирани согласно член 205 и 206 од Кривичниот законик.