Прва владина седница - нови заменици: Рашковски заминува?
Објавено во: Македонија 01 Септември, 2020
Прва владина седница денеска - премиерот Зоран Заев и избраните министри ќе седнат во салата на Владата од каде во следниот мандат ќе носат клучни одлуки за државата. Како и на секоја прва владина седница ќе се определат замениците на претседателот на Владата. Прв вицепремиер е Артан Груби од ДУИ. Оваа функција се воведува прв пат во владината практика. Тој ќе биде и министер за политички систем. Вицепремиер за корупција, одржлив развој и човечки ресурси ќе биде Љупчо Николовски.
Никола Димитров е вицепремиер за европски прашања, а Фатмир Битиќи вицепремиер за економски прашања. Дали денеска ќе се разговара за избор на нов државен секретар и дали на местото на досегашниот Драги Рашковски ќе има замена не се потврдува. Дел од медиумите објавија дека на негово место ќе биде избран Дамјан Манчевски, досегашниот министер за информатичко општество и јавна администрација.
„На првата конститутивна седница се очекува да бидат разгледани предлозите за определување на заменици на претседателот на Владата на Република Северна Македонија, предлозите за именување на претседатели и членови на основните комисии на Владата, како и предлозите за именување на претседатели и членови на посебните комисии, стои во известувањето од Владата.
Инаку генерален секретар на Владата се избира по предлог на претседателот на Владата.