Професори од Хемиско училиште не држат настава, стравуваат дека в.д. директорот Албанец ќе ги загрози

Добивај вести на Viber

Професори од средното хемиско-технолошко училиште во Скопје „Марија Склодовска - Кири“ денеска не одржаа настава, а најавуваат дека нема да предаваат на часовите ниту утре, откако Градот Скопје и министерството за образование и наука назначило етнички Албанец за в.д. директор.

- За прв пат во училиштето се поставува раководител, иако вршител на должност, етнички Албанец, а до сега традиционално директори биле Македонци. Професорите стравуваат дека со неговото назначување се помалку ќе се запишуваат ученици Македонци и ќе се намалат паралелките на македонски јазик, а со тоа ќе биде загрозено и нивното работно место. Недоверба има и во неговото искуство и дали ќе може добро да ја организира наставата на училиштето - вели за „Фактор“ наставник по еден од стручните предмети.

Градоначалникот на Скопје Петре Шилегов изјави дека не е нарушен образовниот процес со тоа што вчера за нов в.д. директор на средното хемиско-технолошко училиште „Марија Склодовска-Кири“ назначил Албанец, што денеска предизвика бојкот на наставата од професори и ученици од македонските паралелки. 

Професорите сакале прво да бидат консултирани, иако не очекувале да го имаат последниот збор и сами да изберат прв човек на средното училиште. За тоа имале и поддршка од родителите.

Училиштето се наоѓа во општина Аеродром и работи во три смени, во кои има и паралелки на албански јазик. Во ова училиште не е прв пат професорите да гледаат со недоверба кон раководствата, но и кон инстанците од кои се назначувани.

Пред десетина месеци неколку професори упатија обвинувања до раководството за отпуштање од работа без отказен рок и дисциплинска постапка, поправање оценки во дневник без дозвола на професорот, непочитување на базичните педагошки норми, самоволие и др.

А.К.