Празна чаша за Попова Кула-Загубата зголемена, извозот тројно намален
Објавено во: Економија 20 Мај, 2017
Винарска визба Попова Кула АД ќе нема причини за наздравување овој период бидејќи не само што втор пат по ред првиот квартал од годината го завршува со загуба, туку оствари и тројно намален извоз со што намалените приходи од продажба допринесоа загубата да биде уште повеќе изразена.
Попова Кула во К1 2017 остварила вкупно 3,2 милиони денари на оперативни приходи од кои продажбата на домашниот е намалена за 1,5 милиони денари и сега изнесува 2,3 милиони денари, а приходите од продажба во странство изнесуваат само 815.000 денари или три пати помалку од лани кога извозот вредел 2,4 милиони денари. Во К1 2016-та вкупните ооперативни приходи изнесувале 6,4 милиони денари.
Во квартал кога продажбата е значително намалена сепак, не дошло до огромен раст на трошоците за производство кои вредат 3 милиони денари, но и не се намалиле платите за вработени, тие дури и се во благ раст и сега изнесуваат околу 800.000 денари, па ќе биде интересно да се следи дали тоа ќе остане така.
Винарската визба годинава за првите три месеци одвојува околу 400 илјади денари за камати што е идентично како и во истиот период од претходната година, додека пак финансиските приходи изнесуваат околу 50.000 денари.
Крајниот резултат според неконсолидираниот финансиски извештај објавен на Македонска Берза, открива дека Винарска визба Попова Кула АД кварталот го завршува со загуба од 1,1 милион денари што е драстично зголемување во однос на истиот период лани кога загубата изнесувала 100.000 денари.
Х.С.