Пратеникот Мухиќ повика да се прекине со поделба на патриоти и предавници
Објавено во: Македонија 10 Април, 2017
Пратеникот од СДСМ, Ферид Мухиќ во Собранието денеска изјави дека ниту една партија нема право да зборува од името на народот.
Порача да се прекине со поделба на предавници, патриоти и да не се користи зборот криминалци.
Мухиќ вели дека доколку некој бил предавник веќе би бил во затвор, и побара да се забрани употребата на зборот „Тиранска платформа“.
„Ве повикувам од името на патриотизмот час поскоро да ја изгласаме Комисијата за избори и именување“ – рече Мухиќ.
Претседавачот Трајко Вељаноски ги повика пратениците да се откажат од репликите и процедуралните за поскоро да заврши расправата по актуелната точка на Дневниот ред.
„Презумпцијата на невиност се користи како штит од криминалците. Дебатата не е основната работа на овој дом. Одлучувањето е основната работа на овој дом. Вие нема повторно да бидете претседател и нема да ги спречите реформите“ – рече пратеникот Павле Богоевски од СДСМ.
Влатко Ѓорчев од ВМРО-ДПМНЕ рече дека СДСМ го газат Деловникот за работа.
Тој вели дека не е во ред да се спомнува дека сега има режим, затоа што има многу медиуми, градоначалници од различни партии, а порано тоа не било случај.
Пратениците заминаа на пауза. Ова е 10-то продоложение на конститутивната седница.