Позитивни вести од акумулацијата „Стрежево“
Објавено во: Економија 05 Јуни, 2018
Започна сезоната за наводнување за сите водокорисници на акумулацијата „Стрежево“. Од јавното претпријатие велат се подготвени со акумулирани рекордни 105 милиони метри кубни вода.
Решен е и најголемиот проблем кој постоеше од 2015 година, свлечиштето на главниот канал е санирано, па така корисниците на акумулацијата Рек Битола, индустријата, земјоделците и Водовод оваа година ќе добиваат вода во максимални количини со непроменета цена.
- Се подготвуваме од технички аспект максимално да им излеземе во пресрет на водокорисниците. Имаме на залиха доволно број цевки, хидромеханичка опрема, а малку се и реорганизираме во делот на факторот – луѓе каде што поинаку сме организирани, се со цел навремена испорака до сите водокорисници и сите настанати дефекти кои ќе се појават во периодот на наводнување во најкраток можен рок да бидат санирани, ијави Методија Граматковски, директор на ЈП Стрежево Битола.
Она што е поволно за нив е и продажбата на електрична енергија од хидроцентралите која ќе се врши по повисока цена.
- Цената која ја добивме е пазарна цена и е зголемена за 38% во однос на минатогодишната и од постечките 2,3 сега е на 2,9 денари односно ќе имаме зголемен приход од производство на електрична енергија, рече Граматковски.
Јавното претпријатие Стрежево планира и изградба на фотоволтаична централа со јачина до 500 киловати која планираат да ја изградат со свои средства. Се чекаат подзаконските акти од Законот за енергетика за да се започне со подготвителни активности.