Политичките превирања во САД ги притиснаа азиските пазари
Објавено во: Економија 18 Мај, 2017
Азиските акции поевтинија во четвртокот поради политичките превирања во САД, соопштија светските агенции.
Јапонскиот главен индекс Nikkei 225 се намали за 1,32% до 19 553,86 поени, откако отпиша 0,53% во претходната сесија под притисокот на силниот јен.
Доларот ослабе до 111,35 јени за долар малку по 9 часот, и се намали во однос на нивото од 113 јени за долар по претходно оваа недела.
Јенот не реагира на податоците за растот на јапонскиот Бруто домашен производ во периодот меѓу јануари и март. Јапонската економија се прошири за 2,2% на годишна основа, надминувајќи ги очекувањата на Ројтерс за пораст за 1,7%.
„Во време кога на глобалните пазари доминираат политичките тензии во Вашингтон, податоците за БДП на Јапонија имаа минимален ефект врз јапонските пазари“, коментира Тим Кондон, управен директор во ING Financial.
Во исто време Kospi отпишал 0,18% до 2 288,85 поени, додека австралискиот ASX 200 се намали за 0,82% до 5 738,30 поени, проширувајќи ја загубата од средата со 1,1%. Во Хонг Конг Hang Seng избриша 0,66% до 25 125,56 поени. На кинеските континентални пазари Shanghai Composite се намали со 0,45% до 3090,40 поени, а Shenzhen Composite забележа пад од 0,63% до 1855,99 поени.
На девизниот пазар доларскиот индекс се тргува околу најниските нивоа од ноември од 97,657 поени кон 9:20 часот по европско време. Вредноста на американската валута се зголеми по изборите во ноември, одразувајќи ги очекувањата од ветените политики на Доналд Трамп. Сега пазарот изгледа ги намалува очекувањата.
Во Јапонија компаниите извознички повторно запишаа падови во цената на акциите, а акциите на Toyota поевтинија со 1,72%, Sony загуби 2,26%, а Honda избриша 2,23%.
Австралискиот пазар е под притисок на банкарскиот сектор, кој продолжува да бележи намалувања. Акциите на Westpac поевтинија со 3,11%, а ANZ намали цената на акциите со 0,38%.