ПОЈАС ГАЗА: Раселени се 38.000 Палестинци, а над 2.500 луѓе останаа без покрив над главата
Објавено во: Свет 18 Мај, 2021
Поради израелските напади во Појасот Газа се раселени 38.000 Палестинци.
Обединетите нации (ООН) информираат дека повеќе од 38.000 Палестинци се раселени во Појасот Газа поради израелските воздушни напади и дека повеќе од 2.500 луѓе се без покрив над главата, пренесува „Данас“. Портпаролот на ООН, Стефан Дижарик денеска изјави дека раселените лица побарале заштита во 48-те училишта со кои раководи Агенцијата на ООН за помош на палестинските бегалци (УНВРА). Во Газа е оштетена 41 образовна институција.
Еден палестински демонстрант загина, а 46 се повредени, од кои 16 од огнено оружје за време на протестите во Западен Брег, соопшти палестинското Министерство за здравство. Стотици демонстранти денеска протестираа пред седиштето на Палестинската управа поради израелската акција во Појасот Газа и во Ерусалим. Тие палеа автомобилски гуми и фрлаа камења врз израелските војници.
Додека некои држави со муслиманско мнозинство, како Турција и Иран, го обвиниле Израел за инцидентот во џамијата Ал-Акса и за злосторствата во Газа, другите земји овој пат биле повоздржани. Израелскиот премиер Бенјамин Нетанјаху денеска изјави дека земјата ќе ги интензивира одговорите на ракетните напади во следните неколку дена.