Поднесено обвинение за насилство против Нефи Усеини и неговиот брат, ОЈО бара и продолжување на притворот
Објавено во: Македонија 02 Септември, 2020
Основното јавно обвинителство Охрид денеска до Основниот суд Охрид поднесе обвинение против Нефи Усеини, советникот на ДУИ во општина Охрид, и неговиот брат за кривично дело насилство. Двајцата во моментов се во охридскиот притвор, откако Апелацискиот суд во Битола не го прифати решението на Охридскиот суд за прифаќање на нивната гаранција од 30.000 евра.
„Обвинетите на 18 август 2020 година, околу 11.30 часот, по претходен договор извршиле грубо насилство врз едно лице при што во јавноста, кај присутни гости и вработени во хотелот Јуник во Охрид, предизвикале чувство на несигурност, загрозување и страв. Обвинетите го повикале оштетениот на средба во хотелот, па откако тој пристигнал со возило, на совозачкото седиште седнал еден од обвинетите. Веднаш започнале расправија, излегле од возилото кај паркингот пред хотелот, каде во меѓувреме пристигнал и вториот обвинет. Во тој момент, двајцата обвинети физички го нападнале оштетениот. При тоа, на еден од обвинетите од пантолоните му испаднал тврд предмет во облик на пиштол, кој потоа го зел вториот обвинет. Оштетениот со тупаници бил удиран во пределот на главата и телото пред влезот на хотелот и внатре, каде обвинетите во пределот на главата го удирале и со тврдиот предмет во облик на пиштол. По извршеното насилство со кое на оштетениот му биле нанесени телесни повреди, обвинетите го напуштиле местото на настанот“, се вели во соопштението на ОЈО.
Јавниот обвинител кој постапува во предметот до надлежниот суд достави и посебен предлог за продолжување на определената мерка притвор за двајцата обвинети, поради постоење опасност од нивно бегство.