Добивај вести на Viber
По силното снежно невреме кое однесе 13 животи, североистокот на САД викендов се соочува со нова закана - огромни поплави како резултат на брзото топење на снегот.
Според државната хидрометеоролошка служба, во најтешко погодените области, снежната покривка која наместа надминува два метри, содржи во себе 10-15 сантиметри вода.
Веќе од денеска се очекува температурата на воздухот да се зголеми на 10 степени Целзиусови и да продолжи да расте во следните денови. Заради ова, американскиот Црвен крст ги повика жителите на најзагрозените места да се повлечат во повисоките области.
Властите во американската сојузна држава Њујорк, пак, стравуваат дека повеќе куќи би можеле да се урнат под тежината на снегот, а дополнителна закана претставува бранот поплави кој се очекува.
„Ако температурите се зголемат така брзо како што се најавува, постои опасност од уривање на некои објекти и тешки поплави. Поплавите можат да бидат ужасни, мислам навистина ужасни. Поплавите можат да бидат полоши од снежното невреме“, вели гувернерот на Њујорк Ендрју Куомо.