Пернар: Колку подолго ќе траат мерките за карантин, повеќе време ќе треба кризата да помине

Добивај вести на Viber

Колку подолго ќе траат мерките за карантин, толку повеќе време ќе треба  „корона кризата“ да помине, вели за Фактор, хрватскиот политичар Иван Пернар.

Додава дека кризата ќе трае се додека доволен број не се зарази и не го преболи коронавирусот.

„Хрватска ќе претрпи голема штета, дел затоа што ќе ја изгуби туристичката сезона, а дел затоа што владините економски политики водат во пропаст, независно од коронавирусот и од туристичката сезона. Вирусот е чекор понапред, затоа што се шири брзо, се пренесува на целата популација, и не може да се запре, но може да се успори“, вели Пернар.

Тој пласираше во јавност информации објавени од New York Post дека на заразените им даваат мегадози од витамин Ц и дека тоа помага.

„Логичното прашање кое се поставува е зошто би им го давале тоа ако не придонесува пациентот да оздраве, односно да се излечи од коронавирусот. На тоа прашање уште никој не ми одговорил“, рече Пернар.

Вели дека сепак не може да се спречи ширењето на опасниот вирус.

„Не може да се спречат ниту половите болести за кои е потребен сексуален контакт, а камоли болести кои можат да се пренесат преку обичен разговор. Колку е клиничката слика послаба, толку е потешко да се препознаат заразените со коронавирусот и да се спречи ширењето на епидемијата. Во претходните случаеви САРС и МЕРС смртноста беше поголема отколку кај короната, и клиничката слика е многу посериозна, и беше полесно да се најдат заразените и да се спречи ширењето. Kaj коронавирусот вие имате ситуација човекот да не знае дека е заразен, затоа што е асимптоматски, а сеедно, тој е преносител“, смета Пернар.

За себе вели дека не се плаши, ниту за своето семејство, но се плаши за повозрасните граѓани.

„Не се плашам за себеси, ниту за мојата сопруга, ниту за детето, туку за бабата  на сопругата која има 80 години и е срцево болна. Таквите луѓе се под ризик за поголеми компликации, на пример просечната возраст за смртност во Италија е 80.5 години. Тоа е возраст за која короната може да биде фатална“, додава Пернар.

За Хрватите вели дека се со поделени мислења, дел се плашат, а дел ги игнорираат насоките кои ги дава власта, но има и трета група граѓани која според него е некаде помеѓу, живее со доза на претпазливост и скептицизам.