ПЕНЗИИ И СОЦИЈАЛНА ПОМОШ: Како растеа пензиите во последните години
Објавено во: Економија 24 Јануари, 2019
Порастот на пензиите стана тема која ги вжешти пензионерските здруженија, а министерката за труд и социјална политика Мила Царовска вчера изјави дека сега со пакетот на пензиски реформи постигнале пензиите да не се замрзнат и да нема зголемување на старосната граница за пензионирање. Реформите беа за намалување на дефицитот во ПИОМ. Инаку законски од стартот на 2017 година пензиите се усогласуваат два пати годишно и тоа на почетокот на годината и од стартот на второто полугодие. Новина од годинава е што со усогласувањето в предвид ќе се земаат само трошоците на живот а не и висината на платите.
Од јануари 2017 година усогласувањето е 0,82 проценти, а од јули таа година изнесуваше 0,76 проценти. Од јануари 2018 година процентот на усогласување е 1,69 проценти, а од јули лани пензиите се усогласија за 1,8 проценти.
Во претходните три години ли во 2014, 2015 и во 2016 години немаше усогласување туку пензиите се зголемија за фиксен износ. Во 2014 година зголемувањето беше 60 денари, следната година за 621 денар, а во 2016 година за 654 денари.
Царовска вчера рече дека доколку растот на економијата е над 4 проценти ќе има и дополнително усогласување во април наредната година.
Пензионерите сметаат дека растот на пензиите ќе биде минимален и најмногу ќе ги погоди тие со најниски примања. Предупредуваат дека социјалната помош ќе биде повисока од голем дел од пензиите.
A.T.