ПАРТИЈАТА НА ЗАЕВ ВЕТУВА: Сите заглавени предмети на СЈО ќе добијат конечна разрешница

Дали се само маркетиншки партиски фрази потребни за секојдневните соопштенија, или социјалдемократите во текот на оваа нова четиригодишна шанса што им се дава, се навистина решени да расчистат со криминалот и корупцијата и да го прочистат судството, а заглавените предмети на СЈО ќе добијат конечна разрешница. 

СДСМ утрово повторно со соопштение дека еден од главните приоритети на владата предводена од СДСМ во следниот четиригодишен мандат, е воспоставување на ред, правда, дисциплина во државата, како и силна, неселктивна борба против криминалот и корупцијата на сите нивоа.

„Задача на новата влада е да обезбеди ред и дисциплина во сите институции и да расчисти со криминалот и корупцијата на сите нивоа, без разлика дали некој доаѓа од партија, од општина, од институција, дали е експерт, функционер. Ќе има проверка на потеклото на парите и на капиталот кај секој функционер, како и санкции за оние кај кои е утврдено нечесно работење“, пишуваат од СДСМ.

Натаму, како што велат, ќе следува процес на прочистување на судството. Оние судии за кои ќе се докаже дека свесно застарувале предмети ќе бидат разрешени, а следува и ревизија на 5 отсто од судски предмети одбрани по случаен избор.

„Предметите од Специјалното јавно обвинителство кои со години се заглавени, ќе добијат конечна разрешница. Поддршката и довербата добиена на предвремените парламентарни избори значи и целосна поддршка во борбата против корупцијата која е непријател и на граѓаните и на институциите“, велат од партијата на Зоран Заев.