Откриен идентитетот на 22 000 припадници на Исламска држава

Добивај вести на Viber

Се појавија неколку документи од Исламска држава (Ирак и Левент ИСИЛ) со податоци на 22 000 припадници на таа организација од 51 земја а ги проследија британските безбедносни служби, објави Скај Њуз.

Со помош на тие документи би можеле да бидат откриени плановите за вооружени напади во Европа, пренесуваат британските медиуми.

Опозициониот сириски портал „Zaman al-Wasl“ објавил дел од формуларот со анкета од 23 прашања за имиња, датуми и места на раѓање, националност дури и крвна група на припадниците на ИСИЛ , во кои имал увид Скај Њуз.

Четвртина се од Саудиска Арабија

Во формуларите истакнати членови на групата ИСИЛ се прашани дали сакаат да и служат на таа организација како бомбаши самоубијци, војници или на некој друг начин, како и да ги наведат претходните „џихадистички искуства“.

Податоците на поедини веќе познати членови на ИСИЛ исто така се наоѓаат во документите, а меѓу нив се и британските државјани Абдал Бари, Јунаид Хусеин и Ријад Кан.

„Zaman al-Wasl“ тврди дека се откриени личните податоци на 1736 борци од 40 земји, од кои четвртина се од Саудиска Арабија.

Меѓу нив има и голем број државјани од Тунис, Мароко и Египет, како и наводно, 16 британски државјани.

Кога се работи за борците од Европа, мнозинството се од Франција, следат државјаните на Германија и Велика Британија, додека четири лица се од САД,  а шест  од Канада.