Осудија продавач во Германија, не пуштал мигранти
Објавено во: Свет 17 Ноември, 2016
Германски сопственик на продавница кој поставил табла со натпис „Кандидатите за азил да чекаат надвор", а до натписот имало слика на куче, е прогласен за виновен за поттикнување омраза од судот денеска, соопштува ДПА.
„Главниот проблем е кучето"- рече судијата, и ја поддржа тезата на обвинителството, според кој натписот ги изедначува луѓето со животни.
Иако во Германија сопствениците на кучиња можат да влезат во многу трговски објекти со нивните миленичиња, животните обично не се дозволени во продавници за намирници поради хигиенски причини.
Таквите продавници традиционално поставуваат табли со натпис „Кучињата треба да чекаат надвор".
Според обвинителството индиректната порака на таблата е дека кандидатите за азил се толку валкани, дека не треба да им биде дозволен влез во продавници за намирници.
Сопственикот на продавницата, кој е од јужниот германски град Селб, доби предупредување и обврзан е да плати 1800 евра на две градинки. Обвинителството бараше казна од 6000 евра.
Адвокатот на одбраната додаде дека неговиот клиент немал цел да деградира ниедна конкретна група.