ОЈО РЕАГИРА ЗА ДНЕВНО-ПОЛИТИЧКО ПОЕНТИРАЊЕ: Ги отфрламе сите информации за наводни притисоци за одредени предмети

Добивај вести на Viber

Од ОЈО се јавија со реакција и тврдат дека не е точно дека имаат притисоци за одредени предмети. 

Во соопштението велат дека јавните обвинители од Основното јавно обвинителство за гонење на организиран криминал и корупција ги отфрлаат сите информации што кружат во јавноста за наводни притисоци врз нив во врска со предметите по кои постапуваат и јавно ги осудуваат ваквите изјави што задираат во нивниот интегритет. 

„Во досегашното работење на сите обвинители во ова обвинителство, без исклучок, во ниту еден момент ниту од Основниот јавен обвинител Ислам Абази, ниту од кој било друг не била загрозена нивната самостојност и одговорност при извршување на нивната функција. Воедно, би сакале да напоменеме дека принципот на хиерархија и субординација, на кои се темели функционирањето на јавното обвинителство, не задира во независноста при одлучувањето на јавните обвинители кои мериторноста на своите одлуки ја црпат од прибраниот доказен материјал, па така секоја непроверена теза и сензација која ја подрива довербата во обвинителството директно го крши Уставот на РСМ“, додаваат од ОЈО. 

Велат дека јавноста треба да знае дека во согласност со Уставот на РСМ и во согласност со законите, никој не може да влијае врз законитото, непристрасното и објективното вршење на функцијата на обвинителството. 

„Од тие причини не смее да се дозволи одлуките на обвинителството да се користат за дневно-политичко поентирање, особено ако се има предвид дека секоја донесена одлука влијае на нечија човечка судбина“, велат од ОЈО. 

За апсењата деновиве за штетниот мазут, премиерот Христијан  Мицкоски вели дека е шокиран од соработката со обвинителот, без да каже дали тоа е Ислам Абази, кој е на чело на Обвинителството за организиран криминал и корупција.

Обвинителството за организиран криминал и корупција вчера објави дека судот одобрил куќен притвор за газдата на „Пуцко Петрол“, Асмир Јахоски, додека за останатите осомничени бизнисмени Ратко Капушевски и Ерџан Сулкоски ефективен притвор, затоа што првиот наводно приложил документација дека е болен. Воедно, тој е татко на четири деца.