Газдата на „Пуцко петрол“ добил домашен притвор зошто бил болен и татко на четири деца

Добивај вести на Viber

Обвинителството за организиран криминал и корупција објави дека судот одобрил куќен притвор за газдата на „Пуцко Петрол“, Асмир Јахоски, додека за останатите осомничени бизнисмени Ратко Капушевски и Ерџан Сулкоски ефективен притвор,затоа што овој првиот наводно приложил документација дека е болен.

Во моментов нема јасен одговор дали обвинителот се согласил со решението на судот и дали ќе има жалба за ваквата одлука.

„Во образложението на Решението е истакнато дека судијата на претходна постапка при донесување на одлуката ги имал предвид околностите истакнати во предлогот на обвинителството, но во исто време ги имал предвид и субјективните околности што се на страна на осомничениот, односно дека истиот со одлука на Основен граѓански суд Скопје е старател на неговите четири деца, од кои три се малолетни, дека има оформени цврсти врски со државата и сопствена фирма со повеќе вработени, како и дека неговата здравствена состојба е нарушена за што доставил документација.

Сите овие околности, како што е истакнато во решението, одат во прилог на намален ризик од бегство и во насока на оправданост за определување на поблага мерка за обезбедување на присуство. Така, Судијата на претходна постапка не прифаќајќи го предлогот на обвинителството одлучил на осомничениот да му изрече мерка куќен притвор, а воедно оценил дека се исполнети условите да му биде изречена и мерка на претпазливост – одземање на патна исправа и забрана за издавање на нова патна исправа.

Обвинителството во соработка со правосудната полиција презема дејствија во насока на обезбедување на докази за сопственост на движен и недвижен имот на осомничените со цел нивно обезбедување заради понатамошна евентуална конфискација“,гласи образложението на ОЈО ГОКК.

Јахоски, Капушевски и Сулкоски се осомничени дека на државата и продавале мазут со сомнителен квалитет за потребите на ТЕЦ Неготино за време на енергетската криза и тоа во вредност од околу 150 милиони евра.