Од партијата на Павле Трајанов велат дека со смислена провокација Бугарија сака да го бугаризира Илинденското востание

Добивај вести на Viber

Демократски сојуз вели дека Парламентот во Бугарија го бугаризира и Илинден. 

Од партијата на Павле Трајанов велат дека наместо подобрување на односите, Бугарија со смислена провокација пред Илинден, националниот празник на Македонците и македонската држава, со резолуција сака да го бугаризира Илинден. 

„Во услови кога ДУИ и СДСМ започнаа постапка за уставни промени, со цел Бугарите да бидат внесени во Уставот на Македонија, Движењето за промени на Кирил Петков (наводниот демократ), тргна по патот на Каракачанов, предлагајќи Бугарскиот Парламент да донесе Декларација со која Илинденското востание ќе го прогласи за бугарско. Оваа Декларација покажува дека уставните промени нема да го отворат европскиот пат за Македонија, туку ќе се искористат за поагресивна антимакедонска кампања, негирање на македонскиот народ, јазик, историја и култура. Македонската дипломатија предводена од ДУИ, ги загрозува нашите национални и државни интереси, поради што се неопходни коренити кадровски промени. И покрај очигледните анационални активности, криминалот, блокада на институциите, огромно незадоволство на граѓаните, СДСМ не трепнува, за сѐ ги обвинува тие што пред седум години биле на власт, но не им сметаше со дел од нив да прават бизнис коалиции. Сакаме јавно да соопштиме дека без реципроцитет, уставни промени нема да има. Само со признавање на правото на здружување на Македонците во Бугарија, можно е да очекуваме промени на подобро. СДСМ треба да ги преспита своите ставови, дали ќе оди на предвремени избори или и натаму ќе го одржува ДУИ на власт“, се вели во соопштението од партијата.

Од соседна Бугарија деновиве доаѓаат изјави со кои отворено кажуваат дека Илинденското востание според нив е бугарско. Ваков став изнесе и бугарскиот претседател Румен Радев.