ОД ДЕНЕСКА КАЗНИ - можни се и кривични пријави за тие што ќе качуваат цени
Објавено во: Економија 17 Март, 2020
Од денеска ќе има високи казни за тие што неосновано ги зголемуваат цените на основните производи, обидувајќи се да профитираат за време на криза.
Ова го најави министерот за економија Крешник Бектеши доцна синоќа на својот фејсбук профил, откако Владата ја прифати одлуката на неговиот ресор за замрзнување на цените на основните намирници.
„Владата го прифати предлогот на Министерството за Економија за забрана за зголемување на цените на продукти од страна на трговците.
Од утре високи казни за сите тие што ќе се обидат да им наштетат на граѓаните вклучувајќи и кривични пријави“, напиша Бектеши.
А Владата на вчерашната седница донела одлука за замрзнување на цените на основните продукти. Тоа значи дека трговците нема да смеат да ги зголемуваат цените на основните производи повеќе од цената која е утврдена како референтна, а таа е онаа што тие продукти ја имале на денот кога СЗО прогласи пандемија, односно 11 март.
Станува збор за леб, сол, зејтин, млеко и млечни произвои, јајца, брашно, месо, тестенини, лекови и дезинфекциони средства, со состојба на денот за прогласување од СЗО, освен за оние за кои има доказ дека се зголемени влезните фактури.
Оваа одлука ќе влезе на сила наредниот ден откако ќе се објаву во Службен весник.
А министерот Бектеши вчера, заедно со инспекторите на државните пазарни инспектори и директорот на Агенцијата за храна, направиле вонредна инспекција во дел од супермаркетите, од што тој објави и фотографии на фејсбук.
„Би сакал да апелирам до граѓаните дека нема простор за паника во врска со доволно залихи на храна“, напиша првиот човек на ресорот економија.
Дел од граѓаните на социјалните мрежи реагираат зошто и заштитните маски не се ставени во оваа категорија на производи чии цени нема да смеат да се зголемуваат.