Ново основно училиште во Чаир, чини 2 милиони евра

Добивај вести на Viber

Општина Чаир денеска и официјално го доби новото основно училиште „Конгреси Манастирит“. Има 23 училници, 18 кабинети и 10 канцеларииски, додека изградбата чинела околу два милиони евра. Лентата ја сечеа, меѓу останатите и премиерот Никола Груевски и лидерот на ДУИ Али Ахмети. За премиерот, ова е најдобриот начин да се прослави денот на албанската азбука. „Со изградбата на новото училиште ќе се излезе во пресрет на потребите на голем број ученици кои во изминатите години одеа во околните училишта, со цел да ги избегнат условите во старите дотраени бараки на старото училиште", рече на отварањето премиерот Никола Груевски, при тоа додавајќи дека најдобар начин да се прослави денот на албанската азбука е да се отвори храм на писменоста и образованието. За министерот за образование Спиро Ристовски , новото училиште има огромно значење за општината, но не одговори зошто на таблата над влезот, нема превод на името на македонски јазик бидејќи  „Конгреси Манастирит“ значи „Битолски конгрес“. „Прашањето е апсолвирано, старото училиште го имаше истото име повеќе од седум години. Училишта со ова име има на повеќе места во Република Македонија и воопшто не е никаква промена на топоними“, рече Ристовски. Капацитетот на ова училиште е 900 ученици во една смена.