Новинарката Марина Овсјаникова си даде отказ, а друга нејзина колешка ја напушти земјата
Објавено во: Свет 15 Март, 2022
Марина Овсјаникова, новинарката на руската државна телевизија Канал 1 која во текот на емитување на вестите се појави со транспарент со кој ја осуди војната во Украина и ги повика граѓаните да не ѝ веруваат на пропагандата која ја емитува Кремљ, денеска е казнета со 250 евра, а воедно си даде отказ.
Таа е обвинета затоа што ги повикала граѓаните на протести против војната во Украина, односно тоа што Русија го нарекува специјална воена операција.
Заблагодарувајќи им се на луѓето кои ја поддржаа, новинарката изјави дека била испрашувана од полицијата повеќе од 14 часа, додека иако побарала правна помош, не ѝ било овозможено да контактира со адвокат неколку часа. Новинарката рече дека одлуката за анти-воениот протест ја донела сама.
Презентерката на вестите Лилија Гилдејева поднесе оставка и ја напушти земјата.
„Прво ја напуштив Русија затоа што се плашев дека нема да ме пуштатв туку-така, а потоа дадов отказ“, му рекла Лилија Гилдејева од НТВ на реномираниот блогер Илија Верламов, пренесува Би-Би-Си.
Гилдејева била водител на „Сегодња“ (Денес), водечката вечерна информативна програма на НТВ, третата најпопуларна руска ТВ станица, која е во сопственост на гасниот гигант Газпром и чија уредувачка политика е прокремљовска.
Во 2021 година Гилдејева била вклучена во официјалната листа на новинари на претседателот Владимир Путин, кои добиле благодарници за „достигнувања во развојот на масовните медиуми“.
Во 2008 година, Путин и се заблагодарил за „обезбедувањето информации и општествени активности кои беа корисни за развојот на граѓанското општество во Руската Федерација“.