Видео: Нов крвав напад во Турција, овој пат настрадаа војници
Објавено во: Балкан 17 Декември, 2016
Во уште еден сериозен бомбашки напад во турскиот град Кајсери загинаа најмалку 13 војници, а армијата соопшти дека експлозијата настанала од автомобил-бомба. Нападот се случил во раните утрински часови во близина на универзитетската зграда во градот Кајсери во централна Турција. Во експлозијата е уништен автобус во кој се наоѓале цивили и голем број турски војници, кои се враќале од работа.
Заменикот премиер Вејси Кајнак соопшти дека нападот со автомобил-бомба бил насочен против турската војска. Тој потсети на последните терористички атентати во Истанбул. Во првото соопштение од армијата стои дека се загинати најмалку 13 војници, а најмалку 46 луѓе се повредени. Меѓу жртвите има и цивили. На телевизиските снимки се гледа изгорената каросерија на автобусот.
Ова е втор крвав напад по бомбите кои одекнаа во близина на стадионот на Бешикташ во Истанбул каде бројот на жртви надмина 40. Кајсери често е под напади на курдските бунтовници, па се очекува токму нивни милитантни групи да стојат и зад оваа експлозија со тоа што судирот со власта на Ердоган станува се пожесток.