НОСЕЛЕ 27 КИЛОГРАМИ МАРИХУАНА ЗА ГРЦИЈА - Полицијата ги приведе

Добивај вести на Viber

Двајца од Албанија сакале да однесат дури 27 килограми марихуана во Грција. Но, како што соопшти Министерството за внатрешни работи на својата веб страница, полициски службеници од Регионалниот центар за гранични работи Запад и Одделот за прекуграничен криминал, миграции, странци и реадмисија Охрид, вчера, по претходно добиени оперативни сознанија, кај с.Кажани – на патот за село Ѓавато, битолско, им го запреле патот.

„Полициските службеници запреле патничко возило „опел вектра“, со ресенски регистарски ознаки, управувано од М.В.(43) од Р.Албанија, а како сопатник бил Т.М(36) од Р.Албанија. При преглед на возилото, полициските службеници пронашле и одзеле две торби со 27 пакувања марихуана, со тежина од околу 27 килограми. Марихуаната била наменета за транспорт во Грција“, соопшти Полицијата.

Од МВР уште додваат дека лицата биле приведени во Полициската станица Битола и по целосно документирање на настанот, до Основното јавно обвинителство Битола, ќе биде поднесена кривична пријава поради постоење основи на сомнение за сторено кривично дело „неовластено производство и пуштање во промет на наркотични дроги, психотропни супстанци и прекурсори“, казниво по член 215  од Кривичниот законик на Р.С. Македонија.