НЕ Е САМО БАЈРАКТАР, ИМА И ДРУГИ OПАСНИ ОРУЖЈА: Србија по дипломатски канали реагирала до Турција за вооружувањето на Косово

Добивај вести на Viber

Српските власти се со став дека Турција интензивно ја вооружува Приштина. 

Државниот секретар на Министерството за одбрана, Немања Старовиќ денеска изјави дека Турција интензивно работи на вооружување, обука и опремување на косовски безбедносни сили, што е во спротивност со резолуцијата 1244 на Советот за безбедност на ОН. Тоа се коси и со Бриселскиот и сите други релевантни договори јави дописникот на МИА од Белград.

„Користејќи дипломатски канали, ние ги предупредивме претставниците на Турција дека ова што се случува е апсолутно неприфатливо. Тие секако, зборуваат за тоа дека се работи за некакви комерцијални аранжмани, за распродажби“, изјави Старовиќ за РТС.

Тој вели дека се работи за вооружување што не е дозволено за Косово и таквото оружје не смеат да го поседуваат Косовските безбедносни сили.

„Од друга страна, врз основа на сето она што го знаеме, имајќи го предвид буџетот што се издвојува за т.н на Косовските безбедносни сили, тие немаат пари за такво нешто и не може да стане збор за комерцијални аранжмани и сосема е сигурно дека се работи за турски донации“, рече Старовиќ.

Вели дека не станува збор само за беспилотните летала од типот Бајрактар, туку и за многу сериозни, софистицирани противоклопни системи ОМТАС, минофрлачи и фрлачи на гранати.

Старовиќ рече дека некој треба да одговори како е можно 24 години по завршувањето на војната, по усвојувањето на резолуцијата 1244, воено-техничкиот договор од Куманово, наместо демилитаризација на Косово, да имаме косовски безбедносни сили опремени со високо офанзивна опрема.

Старовиќ додава и дека Турција е голема сила која има значително политичко и економско влијание на Западен Балкан и дека Србија мора да има добри односи со неа.

Мировната мисија на НАТО на Косово, КФОР, објасни дека очекува косовските институции да ја координираат употребата на сите категории беспилотни летала, вклучително и дронот Бајрактар TБ-2.

Претходно, косовскиот премиер Албин Курти се пофали со дроновите и наведе дека Косово е посигурно и гордо. 

Министерот за одбрана Арменд Мехај ги повика граѓаните да придонесат за инвестирање во Косовските безбедносни сили (КБС) со донирање во Фондот за безбедност. 

фото Фејсбук / Албин Курти