На турската лира и се заканува најголем пад

Добивај вести на Viber

Турската лира е на пат да забележи најголем неделен пад спрема доларот во последните година дена.

Можноста за одржување на нови избори во земјата предизвика страв во поглед на кредитниот рејтинг на Турција, што се одразува и на националната валута.

Лирата денеска се „лизна“ за 0,2 одсто, и е на пат оваа недела да ја заврши во минус од околу 4,3 одсто спрема доларот, наведува Ројтрес.

Индексите на Истанбулската берза паднаа за 0,9 одсто, и се на пат да забележат највисок неделен пад од јуни 2013 година, со загуба на вредноста од околу осум одсто. Истовремено, приносите на 10-годишните државни турски обврзници остануваат на едномесечен максимум.

Зголемената неизвесност во поглед на Турција, предизвикана од оставката на премиерот Ахмет Давутоглу, доаѓа во услови на слабеење на берзанските индекси на пазарите во развој, со шест последователен ден  на азиско-пацифичкиот индекс МСЦИ.

Турција, како што оценува Ројтерс, помина турбулентна недела, со оглед на тоа дека премиерот поднесе оставка, откако скокнаа очекувањата дека американската рејтинг агенција Стандард енд Пурс подоцна во текот на денот ќе го намали рејтингот на Турција за еден степен на „неинвестиционо ниво“.