На Албанците во Бујановац „претседател им бил Нишани, а не Николиќ“
Објавено во: Балкан 07 Март, 2017
Претседателот на Албанија, Бујар Нишани, денеска пристигна во Бујановац, со што ја почна посетата на општините во Србија со мнозинско албанско население.
Како прв претседател на Албанија кој е во посета на Србија уште од 1948 година, на Нишани во Бујановац му беше приреден свечен дочек во присуство на локални функционери. Повеќе илјади граѓани го поздравија со веење на албански знамиња.
Тие го дочекаа со голем билборд на кој е ликот на албанскиот претседател и порака на албански јазик. Билбордот на кој пишува „Добредојде претседателе“ е поставен во центарот на Бујановац близу зградата на општината. Уште еден таков билборд, нешто помал е поставен и на Плоштадот Караѓорѓе.
На никого нема да му дозволиме да сонува соништа на сметка на нашата територија и виталните интереси на нашиот народ, изјави српскиот премиер Александар Вучиќ, коментирајќи ја посетата на Нишани на југот на Србија, пренесуваат српските медиуми.
„Од ништо не сме исплашени, отворена земја сме и секој е добредојден, но кон оној што ќе помисли дека може или смее да го наруши интегритетот на нашата земја, мојот одговор е да не го прави тоа и да не се ни обидува“- вели Вучиќ.
Српскиот премиер рекол дека Србија умее да го пречека секој гостин, дека таму бил и претседателот на Координативното тело за југот на Србија Зоран Станковиќ, но забележал дека „не било убаво тоа што немало интонирање на српската химна“ на пречекот на Нишани.