МОЖЕН СУДИР НА ИНТЕРЕСИ: Антикорупциска препозна случај кај браќата Бесими
Објавено во: Македонија 22 Август, 2020
Билјана Ивановска, претседателка на Антикорупциската комисија вели дека првиот потенцијален судир на интереси го препознаваат при изборот на владата, чиј член, според најавите, треба да биде Фатмир Бесими како министер за финансии, кој пак е брат на пратеникот Флорин Бесими, објави Алсат М телевизија.
- Пратеникот е избран од страна на народот, тоа не е спорно. Меѓутоа, тој никако не смее да учествува во изборот на својот брат. Прво, тука го гледам судирот на интерес и тој (Флорин Бесими) треба да се изземе од постапката за избор на влада и од гласањето за членови на влада, каде неговиот брат (Фатмир Бесими) е кандидат – изјави Ивановска за Алсат М.
Инаку пратеничкиот глас на Флорин Бесими е четврт глас од ДУИ кој виси за изборот на новиот владин состав. Изминативе денови, во повеќе медиуми се пишуваше за несогласувањата во редовите на ДУИ во однос на дел од кадровските решенија што лидерот Али Ахмети ги предлага за новата Влада.