ММФ СО ПРЕДУПРЕДУВАЊЕ: Грција мора да продолжи по патот на економските реформи

Добивај вести на Viber

По неуспешните обиди да се избере претседател на државата, Грција се соочи со уште еден во низата проблеми. ММФ соопшти дека ќе ја суспендира финансиската помош од „Пакетот за спасување“ се додека не се формира новиот владин состав. Германскиот министер за финансии, Волфганг Шојбле, ја предупреди земјата дека кој и да дојде на власт мора да се придржува  до економските реформи во земјата. Тој нагласи дека Атина и понатаму ќе мора да ги почитува обврските преземени во изминатиот период и да ги исполнува ветувањата поради кои  доби финансиска помош од 110 милијарди евра. „Тешките реформи дадоа плод и тие немаат никаква алтернатива“, истакна Шојбле, откако грчките пратеници предизвикаа предвремени избори со тоа што не успеаа да изберат нов претседател. Грчкиот парламент денеска по трет пат не успеа да избере претседател на земјата, по што, според Уставот, парламентот треба да се распушти и да се распишат предвремени парламентарни избори. Премиерот Андонис Самарас изјави дека изборите ќе се одржат на 25 јануари. Опозициската партија Коалиција на радикалната левица (СИРИЗА) која бара ревизија на договорот на Грција со Европската унија и со Меѓународниот монетарен фонд, според анкетите има најголем рејтинг.