Митко Јанчев: Јас не сум иницијатор на трета опција
Објавено во: Македонија 06 Октомври, 2019
Градоначалникот на Кавадарци, Митко Јанчев, кој беше разрешен од функцијата заменик претседател на ВМРО-ДПМНЕ негира дека е лично иницијатор на трета политичка опција.
Засега само вели дека има шпекулации за воспоставување на десна трета опција и дека ако опозицијата продолжи со истата политика и реторика има простор за нова партија, без разлика дали тој ќе учествува или не, за што треба времето да утврди.
Инаку, токму во интервју за Фактор, Јанчев спомена дека доколку раководството на ВМРО-ДПМНЕ не ја смени реториката и политиката, се остава простор за формирање на нова политичка партија, во која би учествувале поранешни членови на ВМРО-ДПМНЕ.
„Сосема негирам дека учествувам во основањето на партија. Јас не учествувам во вакво нешто. Слушаме различни шпекулации од медиумите, од граѓаните дека се прават подготовки за ова, но јас сум на мислење дека доколку се води истата политика и реторика, тогаш има многу простор за третата опција. Ова не значи дека би учествувал во таа опција. Сè ќе зависи од околностите и моментот “, рече Митко Јанчев, градоначалник на Кавадарци.