Минималните плати во светот – каде е Македонија?

Добивај вести на Viber

Пред неколку дена Организацијата за економска соработка и развој (ОЕЦД), во која членуваат 34 развиени земји, објави интересна статистика. На профилот на Твитер организацијата сподели графика, која ги споредува минималните плати на час по даноци, пресметани во американски долари, во неколку држави во светот. Податоците се за 2013 година.

Најнапред на рангирањето се Австралија и Луксембург со 9,54 долари и 9,24 долари на час.

На дното се Латвија и Мексико, со нивоа под 2 долари - односно 1,46 долари и 1,01 долари.

САД, каде федерално пропишаната минимална плата на час е 7,25 долари (или 6,26 долари по даноци), е рангирана на 11-то место.

За Македонија не се објавени податоци во рангирањето. Меѓутоа кај нас минималната плата изнесува 8050 месечно според најновите законски измени.

Деновиве темата е доста актуелна на собраниските седници каде жестоки дебати токму по ова прашање водат опозицијата и власта.

Опозицијата предлага минималната плата да биде зголемена од 8050 на  11 илјади денари во нето износ и да важи за сите сектори, додека од владечката коалиција велат дека предлогот е популистички.

Едните тврдат дека со повисока минимална плата ќе се подобри стандардот, другите дека стопанството тоа нема да издржи.

Според предлог законот минимална плата од 11 000 денари ќе имаат околу 50 000 работници во индустријата, висината ќе се усогласува со трошоците на живот и просечната плата, и ќе се формира фонд од 18,5 милиони евра со кој ќе се субвенционираат работодавачиоте за да не делат откази.

На крајот, без разлика дали станува збор за бруто или нето износи, ако влезе во оваа табела, нашата земја би била на дното по ниво на минималната плата.