Милошоски вели дека СЈО ќе отвори предистражна постапка за сите кои зборуваат против Заев
Објавено во: Македонија 10 Април, 2017
Пратеникот на ВМРО-ДПМНЕ, Антонио Милошоски денеска во Собранието зборуваше за Специјалното јавно обвинителство.
Тој вели дека ако членовите на ВМРО-ДПМНЕ зборуваат против раководството на СДСМ, ќе добијат пријава од СЈО.
„Ако не го толкувате Деловникот како што му одговара на СДСМ, ќе добиете пријава од СЈО. Ако Илија Димовски зборува нешто против Заев, ќе се отвори предистражна постапка од СЈО против Илија Димовски. Ако Ѓорѓе Иванов не го даде мандатот на Заев, ќе биде отворена предистражна постапка од СЈО против него. Така функционира демократијата на оние кои велат дека треба да го прекршите Деловникот, но овде секој е подеднакво важен“ - вели Милошоски.
Радмила Шекеринска од СДСМ му одговори дека и него како голем патриот го има во „бомбите“, па затоа е нервозен и дофрла.
„СЈО било болката и тука е причината за долгите дискусии, за блокирање на Собранието за изолирана Македонија, меѓутоа тоа е ваш проблем“ - вели Шеќеринска.
Таа им порача на колегите пратеници од ВМРО-ДПМНЕ дека Македонија не печалела кога ги договарале тендерите и носеле гласачи од Пустец.
Таа потсети на „бомбите“ и рече дека битката е Македонија малку да здивне од крадење и лажење кое изгледа како бесконечно.