Миле Јанакиески: Владиката Агатангел беше организатор на протестите во Центар
Објавено во: Македонија 17 Септември, 2020
Поранешниот министер за транспорт и врски Миле Јанакиески, обвинет за поттикнување на насилниот протест пред Општина Центар, денеска на судското рочиште рече дека тој не е одговорен за демонстрациите кои ја спречија работата на локалната самоуправа, туку дека организатор на истите бил владиката Агатангел.
Според обвинетиот, партијата ВМРО-ДПМНЕ не била организатор на протестите, а од сведоците можело да се чуе дека тоа бил владиката Агатангел, кој според Јанакиески, требало да биде повикан да сведочи.
Случајот „Насилство во Центар“ денеска требаше да продолжи со завршни зборови на обвинетите за протестот од 2013, но одбраната побара дополнување на доказната постапка.
Судот денеска не прифати нова снимка од разговор меѓу поранешниот премиер Никола Груевски и Миле Јанакиески, која можеше да фрли нова слика за случувањата пред општина Центар.
Адвокатот на Јанакиески, Еленко Миланов, рече дека снимката е од 1.6.2013 година, а на истара, според одбраната, Груевски бара да се организира состанок на партиските тела.
- Сепак, таков состанок Јанакиески не можел да организира бидејќи на споменатиот датум бил на заедничка средба меѓу владите на Македонија и Србија., рече Миланов.
Единствено што Судот прифати е дека снимката е конвертирана.