Мицкоски: Заев тргуваше со свети работи, а за возврат не доби ништо
Објавено во: Македонија 23 Октомври, 2019
Христијан Мицкоски, лидерот на ВМРО-ДПМНЕ, во денешниот говор во Прилеп најави дека доколку неговата партија успее да дојде на власт по предвремените парламентарни избори во април ќе биде испитано потеклото на имот на сите политичари.
- ВМРО-ДПМНЕ ја запали машината и ќе ја донесе победата. Ќе покажеме како одговорно се владее. Јас не влегов во политиката за корист, за кауза и за идеал. Мојата цел е успехот. Вие сте нашата сила, а силата ја прават сплотени луѓе. Ќе победиме заедно со срца кои чукаат како едно. Кажете по улиците и маалата дека обновата доаѓа, рече Мицкоски пред прилепчани.
ВМРО-ДПМНЕ во салата „Марко Цепенков“ го прославуваше националниот празник, а Мицкоски им се обрати на кандидатите кои ќе ја застапуваат ВМРО-ДПМНЕ на следните избори и порача дека ќе бара отчетност и одговорност и од нив. Додаде и дека Зоран Заев ќе „падне“ затоа што тргувал со свети работи, а за возврат не добил нешто.
- Повеќето од вас овде ќе бидат кандидати и треба да знаат дека по изборите ќе имаат одговорна задача да ѝ служат на земјата и да раководат со институциите. И имам неколку пораки до вас: Немојте никогаш, ама баш никогаш да го разочарате народот. Од него ќе ја имате довербата, и тој е најважниот столб во оваа држава. Вие му служите нему, а не тој вам. Нема да имам милост кон било кој што ќе посегне по неправда и корупција, одговорност за сегашната власт ќе има за оние кои се огрешиле кон законот, а со лупа од блиску ќе ја следам и вашата работа и за секој престап одговорноста ќе биде понесена, без оглед колку некој е близок со мене и колку битки заедно сме издвојувале, наведе Мицкоски.