МАКРОН ОДГОВОРИ НА БАРАЊЕТО НА ЗЕЛЕНСКИ: Каква помош испраќа Франција во Украина?
Објавено во: Свет 31 Март, 2024
Франција најави испорака на оклопни возила и проектили за Украина.
Франција се подготвува да ѝ испрати на Украина нови ракети земја-воздух Астер 30 кои можат да пресретнат воени авиони, беспилотни летала и крстаречки ракети на домет од 120 километри.
„Франција ќе испорача стотици стари оклопни возила и нови ракети земја-воздух“, изјави денеска францускиот министер за одбрана Себастиен Лекорни.
Во интервју за „La Tribune Dimanche“, тој додал дека францускиот претседател Емануел Макрон побарал од него да подготви нов пакет помош што ќе вклучува стара, но сепак функционална француска воена опрема по разговорите со украинскиот претседател Володимир Зеленски, пренесува Ројтерс.
„Украинската армија мора да брани многу долга линија на фронтот за која се потребни оклопни возила. Ова е апсолутно клучно за мобилноста на војниците и е дел од барањата на Украина“, вели Лекорни.
Француската армија постепено ги заменува илјадниците свои оклопни воени возила кои беа во служба со француските вооружени сили од 1970-тите.
Макрон претходно ја спомена и идејата за испраќање на војници во Украина со цел да им се помогне на украинските вооружени сили во борбата против руската инвазија. Пред две години и еден месец, почна руската инвазија на Украина.
Русија изминатата ноќ лансирала 16 проектили и 11 дронови кон Украина, при што загинало најмалку едно лице, соопшти украинското воздухопловство. Русија го гагаше и Лавов.